隱適美箍牙過程全紀錄 #康齒堂 #游舜華牙醫 #透明牙箍 (第 12 副牙箍 - refinement)

Day 407

哈哈, 好耐無寫, 依家成1月先黎補寫返~

今晚要換第12副牙箍, 預計無問題, 因為今次都帶夠時間!

Day 408

大家冬至快樂, 由晏晝食到夜晚,好飽呀~

今日天氣唔太好, 落毛毛雨, 不過一家人一齊就開心啦~

Day 411

又到平安夜啦~ 今年真開心, 有4日假期~

可惜每年到呢個時候, 我卻周身唔得閒, 人地去happy, 我就埋頭苦幹

夜晚去左食日本野, 好味, 唔知點解聖誕節既日本餐係唔會加價架呢???

隱適美箍牙過程全紀錄 #康齒堂 #游舜華牙醫 #透明牙箍 (第 11 副牙箍 - refinement)

Day 400

今日換新牙箍啦~ 望下D牙, 原來下排既2隻門牙終於....終於郁到直一直啦!

好開心呀!! 因為第一round箍得唔好就係因為下排既門牙跟唔上進度~

到refinement個陣都有擔心下排牙會唔會都係唔係郁得咁好...

好彩依家見到2隻牙都郁得好好....安心哂啦~

Day 404

帶左頭2日, 上下門牙都有D酸軟...今日就無痛啦

今日上網見到有人剛剛箍牙, 好痛食唔到野~

最開始既時候我都有買定乳酪, 今日見到有人話仲可以食薯蓉...

其實, 仲可以食粥、蒸水蛋、啫喱...

所以同大家分享返, 到時箍牙真係痛到食唔到野, 就可以參考下~

大家有咩提議都可以一齊分享下架

隱適美箍牙過程全紀錄 #康齒堂 #游舜華牙醫 #透明牙箍 (第 10 副牙箍 - refinement)

Day 393

哈哈, 依家一星期換一副牙箍之後, 除左時間快過左...

連我個blog都好似唔同左, 因為發覺原來一星期只係打到2篇文...

之前2星期先開新一頁, 唔覺得咁少文...

雖然如此, 但係我都唔會增加我既文...因為最近實在太忙太多野做啦~

而且，我想講既，大家唔知既野，我都講得7788, 大家都只係睇住我不停換新牙箍啫...

當然我唔會放棄呢個blog...會繼續update..不過大家就唔好怪我打得太少lor...

今日換牙箍, 唔痛...係一D感覺都無...

原來牙箍真係帶一星期就足夠移位....

咁....之前一直都帶2星期個D, 咪蝕左囉~哈哈哈

Day 395

由於依家帶一星期就換新牙箍既關係...

我依家都會帶埋牙縫刷出街...食完飯之後儘量帶返個牙箍, 唔等到返屋企刷牙先帶

主要都係因為我已經係refinement, 無得再調整, 所以都係箍得足D好~

隱適美箍牙過程全紀錄 #康齒堂 #游舜華牙醫 #透明牙箍 (第 9 副牙箍 - refinement)

Day 386

今日換新牙箍, 幾好喎, 無咩大感覺喎...

睇黎上一副箍得幾好~

Day 389

最近又有朋友話我瘦左...

不過其實磅重係無輕過,  所以我諗應該係塊面瘦左~

最緊fb間唔中又彈D以前既相出黎...

未箍牙前我塊面都真係幾包...原來不知不覺間, 塊面已經變尖左~ 哈哈 (開心中...)

隱適美箍牙過程全紀錄 #康齒堂 #游舜華牙醫 #透明牙箍 (第 8 副牙箍 - refinement)

Day 379

今晚換左新牙箍, 希望舊個副真係帶得夠時間啦~

因為平時帶2個星期, 係帶到完全無哂感覺先換下一副...感覺好D

屋企人今日先問我, 點解好似箍左好耐都未箍完...

我計計下...依家快左一半...應該下年年中就箍完啦....掛~哈

Day 381

帶左2日個箍, 都仲有少少覺得緊~ 睇黎一星期換一副牙箍既代價就係會感覺大D

其實帶左咁耐, 有時食野都仲係會有D酸軟, 再好用力扯D食物既時候, 隻牙就會唔夠力~

Day 385

話咁快聽日就換牙箍啦~

最近天氣凍左, 成日帶住牙箍飲茶, 所以今次個牙箍明顯黃好多,原來茶真係好上色...

隱適美箍牙過程全紀錄 #康齒堂 #游舜華牙醫 #透明牙箍 (第 7 副牙箍 - refinement)

Day 372

今日去覆診，有好消息，好開心~

第1件事，牙醫話我下次再唔見牙箍，可以打比佢地配返一副新既~ 即係唔洗skip一副黎帶...

第2件事，就係我第6副都帶得好貼啦，跟得上進度~ 可以換第7副~

第3件事，最令人興奮既一件事，之後既牙箍帶一個星期就得啦~ 唔洗再帶2個星期~

牙醫話invisalign個邊做左個研究，發現只要每日帶足22小時，副牙箍帶一星期同帶兩星期既效果係一樣架~ 所以依家開始所有牙箍都係帶一星期就ok啦~

當然前提係要每日帶足22小時，如果帶唔足，換第二副牙箍既時候應該會好痛而且會跟唔上進度~

聽到呢個消息，即係箍牙日子差唔多縮短左一半呀~ 係咪真係令人興奮呢? 哈哈

Day 378

嘩嘩嘩...轉左一星期換一次牙箍, 時間過得真係快呀...

聽日就可以換第8副牙箍啦...

不過今日都仲係覺得有少少感覺...聽日換箍會唔會未帶夠時間呢??

定係帶埋聽日就夠呢??

隱適美箍牙過程全紀錄 #康齒堂 #游舜華牙醫 #透明牙箍 (第 5 副 + 第 6 副 牙箍 - refinement)

Day 358

今日換新牙箍, 真係無痛呀~ 好開心~

Day 360

今日, 不幸既事又再發生...

我又唔見左牙箍...只係帶左2日渣...嗚嗚嗚嗚嗚

真係差D想落返樓下餐廳個垃圾桶度搵呀!

唯有auto skip帶第6副...好zzzzzz好zzzzzz好痛呀!!!!!!

唉....唔開心~

Day 363

今晚又刷完牙, 再用牙縫刷~

發覺上排牙，後面有2隻牙個牙縫細左...之前成日都係因為呢2隻牙縫ZIP住好多野...

可能已經開始移動尾2個隻牙, 所以個牙縫窄返, 2隻牙開始貼返埋...

咁咪即係開始到尾2同尾3隻牙有牙縫囉?? 係咪咁呢??

唔知大家明唔明我寫咩...不過總之D牙縫好鬼麻煩, 成日ZIP哂D野, 討厭!!!!

Day 365

原來今日已經係第365日....已經箍左1年啦....

咁樣就過左1年既時間...成日仲覺得箍牙箍到日子好漫長, 原來咁就一年...真係快~

Day 371

聽日去覆診, 唔見左第5副牙箍唔知進度有無落後到...哭

隱適美箍牙過程全紀錄 #康齒堂 #游舜華牙醫 #透明牙箍 (第 4 副牙箍 - refinement)

Day 335

今晚帶新牙箍...上一副已經變得好黃啦~

今次refinement好似好慢長咁....依家先到第4副

希望快D箍完啦~

Day 342

有個朋友已經箍完隱適美幾年...

佢愈來愈注重自己既牙齒..

到依家我都箍左1年既時間, 開始明白點解佢會咁

首先, 我開始左用牙縫刷...每次當唔係好情願, 想偷懶既時候..

一用牙縫刷刷到有野食既時候, 就會想將每隻牙都刷乾淨

因為一諗起個D野食係個口到過一晚, 仲要俾個牙箍套住, 就覺得對D牙唔好

又會覺得好唔衛生...

第二, 用左咁多錢去箍牙, 又用左咁多時間, 心機去整靚棚牙...

如果唔好好護理住, 變得牙又黃, 又蛀牙, 係咪搵黎搞呢?

所以, 我開始明白我位朋友既想法...

最近, 我又開始用埋牙線, 因為發現原來牙縫刷係刷唔到牙同牙之間既位...

當用牙線既時候, 發覺牙同牙之間原來都藏左好多牙垢...

無論刷牙, 甚至用電動牙刷, 都係刷唔到架...

所以大家不妨考慮用牙縫刷同牙線,好好愛護你既牙齒啦~

Day 350

本來聽日要換牙箍的, 但早幾日去左出差, 要講普通話, 所以好多時間我都無帶牙箍...

但係因為今次已經係refinement, 箍得唔夠時間無得再免費refine...

所以唯有帶多一個星期...希望跟貼個進度~

Day 357

聽日可以帶新牙箍啦~ 連續2個牙箍都帶左3星期...

真係有D厭悶~ 如果一星期換一副....D日子唔知會唔會快過D呢? 哈

隱適美箍牙過程全紀錄 #康齒堂 #游舜華牙醫 #透明牙箍 (第 3 副牙箍 - refinement)

Day 309

今日去左貼返D粒粒, 原來甩左2粒...好快搞掂~

就叫我走人, 本來以為佢會俾多1,2副牙箍我...

但係佢話叫我照舊2個星期後覆診, 想確定我跟上進度...

真係幾欣賞康齒堂既員工, 唔只游舜華牙醫好專業, 連其他姑娘、幫我跟進既牙醫都好好...

返到屋企就帶第3副牙箍啦~

多返2粒attachment...個箍又好似緊緊地...

Day 312

帶左幾日第3副箍, 已經習慣左啦~

有日同朋友出黎傾計...佢地不停拎D零食出黎, 朱古力、魷魚、薯片....XFDFAEARAR

仲要係咁話好好食呀...係邊度買返黎呀~

但因為我"懶"! 唔想除牙箍, 食完又要嗽口, 再等一陣先帶返個箍...

所以........我一粒、一條、一塊都無食到~

其實箍牙真係可以減到肥架........................如果你好似我咁"懶"~ 哈哈

Day 317

早幾日右邊牙肉整損左...我由佢照帶牙箍...

我唔記得左之前都試過整損一次....唔記得左帶住牙箍D牙肉係唔會好返架~

結果，第二日起身仲痛...所以唯有唔帶牙箍住啦~

希望快D好返啦~ 如果唔係唔帶幾日牙箍, 再帶返個陣應該會幾痛...

不過我都唔明點解帶住牙箍既話D牙肉唔會自己好返...唔知有無人知呢?

Day 326

我啲牙肉終於好返啦，食左幾日消炎藥...差不多一星期有多...

結果一帶返牙箍，果然不出我所料..................................."痛"

好彩我醒目，選擇訓教前先帶牙箍，依家直接去訓教先啦~ 早抖 ~

Day 328 

今日去覆診，同左牙醫講我無帶牙箍一星期，因為牙肉痛...

佢幫我睇下D牙，然後..................................又幫我洗牙 (清牙石)""""""

都話左無心理準備呀~~~~~~

佢話因為有好多牙石，可能因為D牙石令到牙肉腫，叫我謹記要用牙線/牙縫刷...

結果..........我夜晚刷完牙，再用牙縫刷，續隻續隻牙咁清潔，連最最最入面個隻牙都清潔埋

應該唔會再牙肉痛啦掛....

Day 334

終於到星期一，聽日可以換新牙箍啦~

我依家日日都有用牙縫刷, 因為D牙真係好鬼疏, 隻隻牙都有ZIP住D野食

仲要係ZIP住好多, 唔係少少咁簡單...

其實開始左箍牙, 真係一條不歸路...

唔可能中途放棄~ 因為.....D牙已經郁左位, 如果係中途唔箍...

咁D牙就會郁D唔郁D...咬合又唔O岩位, D牙縫又疏...

所以開始左箍牙, 點都要完成佢, 如果唔係份份鐘差過唔箍~

隱適美箍牙過程全紀錄 #康齒堂 #游舜華牙醫 #透明牙箍 (第 2 副牙箍 - refinement)

Day 296

今日日去左覆診啦，今日去左加返D粒粒，整左成個鐘呀，因為有一隻牙唔聽話，貼左3次先黏得實，個牙醫都好好耐性，中間仲不停比我漱口休息下，不過張大個口成個鐘，真係幾攰下....D粒粒返黎，個牙箍好似好力左...哈哈

過幾日我會影相比大家睇下D粒粒架啦~

Day 299

帶返個有力既牙箍之後，又開始變得唔係好識咬野食...食得好慢啦又~

應該又可以再次減肥~ 哈哈哈哈哈

應承左比大家睇下到底咩係粒粒(attachment)

去相啦...



係D牙面上面白色一粒粒個D就係"粒粒"啦

有D牙仲會貼2粒架...最左面個度就貼左2粒~

完成任務~哈哈

Day 308

上星期下排牙有一粒attachment甩左...係食緊野個陣甩既, 好彩無吞落肚啫...

約左聽日去康齒堂貼返~

最近，我愛上左一樣野，用黎清潔牙齒

事關我成日洗完牙無幾耐, 1,2個月D牙縫就已經有牙垢...

於是，早2星期買左牙縫刷黎用....

刷完牙之後，再用牙縫刷zip落D牙縫之間...

第一晚用個陣....嘩...隻隻牙都有野痴住係支牙縫刷既...

如是者, 連續用左2個星期，日日都係有咁多野刷到出黎...

用埋牙縫刷...希望唔會再咁快有牙垢啦...

隱適美箍牙過程全紀錄 #康齒堂 #游舜華牙醫 #透明牙箍 (第 1 副牙箍 - refinement)

Day 275

今日去了拎refinement既牙箍...

牙醫叫我訓低睇下D牙咩情況...

睇下睇下....點知無啦啦個牙醫開始幫我洗牙"""""

我完全無心理準備今日要洗牙架喎 ~~~~!!!!!!!!!

洗完牙就帶第一副牙箍....都係覺得...無咩感覺~

講起無咩感覺..個牙醫話我好彩/忍得痛~ 通常D人都有感覺的...緊呀~痛呀~唔舒服呀~

其實我都唔係無感覺既...只係我帶住既時候唔覺得唔舒服...

而且通常都係頭2,3日除牙箍既時候有少少酸軟,好快就無事~

希望你地箍個陣都同我一樣...無大痛楚啦!!

繼續講返...帶完牙箍之後, 就叫我2星期後去覆診

因為第2副要再加多2個粒粒(attachment)...

下次覆診後, 我會影相俾大家睇下, 究竟咩係粒粒呢??????

Day 276

今日起身刷牙, 除牙箍都無咩唔舒服, 又係除牙箍個下, D牙好似大解放咁有一下酸軟

跟住無事啦~

Day 289

原本應該今日去覆診的, 但係我有D事去唔到, 於是改左下個星期, 所以呢副就要帶多一星期啦

隱適美箍牙過程全紀錄 #康齒堂 #游舜華牙醫 #透明牙箍 (第 14 副牙箍 - 第一階段完成)

Day 185

今晚換牙箍....本來以為唔痛....結果都係痛....每次痛既話我都會好快咁走去訓教...

訓著左就唔痛啦嘛....哈哈....早抖啦各位

Day 186

今朝訓醒除牙箍...痛~ 好似近呢2,3個箍都有痛...

睇黎我真係唔可以咁懶...要帶返多D時間先得~

唔知有無人真係好乖咁每日都係帶22小時架呢? 好難做到耶.....

Day 191

琴日有事, 所以成日都無帶過咁滯....唉呀~ 唔知點先可以補返個十幾個鐘既時間....

有時訓教前唔記得帶...到差唔多訓著先諗起, 個下真係好唔願落床架....有無人有同感? 哈

Day 195

今日見左個好耐無見既朋友....通常我都唔會主動講自己箍緊牙....

不過又真係到E家都係得少於5個朋友有留意到我箍牙...

可能我自己又有少少遮遮掩掩啦....其他朋友都唔覺...所以隱適美係真係睇唔出有左牙箍架..

當然...自己心理作用就梗係覺得好顯眼啦~

不過依家無帶牙箍時,我都可以放膽笑...以前會就住就住, 等D哨牙唔好咁覺眼..依家真係唔洗啦

Day 206

好多日無update...因為我排牙有新進展...

6月7日去覆診，牙醫話我下排牙應該箍完第14副就完成，但係睇我下排牙，仍然未齊，我是疊住的，但上排牙又箍得好好喎，原先我應該仲有7副牙箍就箍完...

但因為我下排牙箍得唔理想，而繼續箍第15,16,17.....21副個牙箍都係一模一樣，所以我可以提早做refinement (即微調)，包一次免費的! 於是，我又要再去印牙模，然後再等一星期(即今日)返去睇電腦模擬圖....

所以我第14副牙箍係一直帶到依家....因為電腦模擬圖係根據我依家既牙去設計牙箍....如果我帶第15,16,17.....副牙箍，D牙走左位，咁新既牙箍咪唔對位囉....

講返睇電腦模擬圖....我下排牙要繼續箍啦...要箍多15副先得，而且新牙箍仲會幫我貼返埋D牙(因為之前有個位成日ZIP野食...)，即是話...原本箍21副, 依家變左14+15 = 29 副...

不過要等幾星期D新牙箍先到，所以呢個第14副牙箍睇黎要帶好長日子.....(每日要認真洗乾淨個牙箍先得!)

BTW，牙醫真係好好，超有耐性，絕不Hea 答~

Day 214

早2日收到診所電話，叫我見牙醫，我心諗: 咁快就有牙箍?

去到見到牙醫，佢話問左游醫生，唔可以下面排牙用新牙箍，上面排牙用舊箍，因為怕上下咬合既位會唔同，而且游醫生話唔想我咁快放棄，排牙再繼續箍可以好靚，XFKAFJAFJOJFJLO....所以最後我要箍多一段唔係短既時間，我又唔記得係幾多副，等我下次去拎新牙箍後，再匯報返....

Day 250

最近實在太忙, 忙到完全唔記得要上黎update下,不過其實最近都無咩特別, 因為我既新牙箍都仲未到....哈哈!

我仲係帶緊第14副牙箍, 開始我已經覺我個牙箍好污糟, 日日都刷好耐, 感覺上乾淨D

當然啦....無新牙箍, 即是我D牙都無新進展...不過近期都影左幾多相~ 真係好多角度影出黎都唔覺哨牙~ 係最開心既事~

Day 258

今日又到大家分享下箍牙時既搞笑野....

就係打乞次既時候...平時我都係好細聲咁打乞次

但當箍緊牙既時候, 就會有個問題啦~ 因為要打得細聲, 就要緊閉個口, 但個衝力都幾勁~

個牙箍會受到衝力而更加貼D牙, 好緊...哈哈, 所以要重新習慣一下點樣打乞次

所以開頭個陣, 成日為左就住個牙箍, 而打乞次變得好大聲~ 嚇親人~ 哈哈哈

Day 267

今日終於收到電話...約左下星期2覆診拎牙箍~

我既第14副牙箍可以告一段落啦~ 哈哈

隱適美箍牙過程全紀錄 #康齒堂 #游舜華牙醫 #透明牙箍 (第 13 副牙箍)

Day 172

今晚換新牙箍, 睇黎上一副真係帶唔夠時間, 痛呀!!!!!!

要快D去訓教....會無咁痛....

當然亦因為我懶訓,所以痛住都訓到教~哈哈

Day 175

已經帶左新牙箍幾日, 不過除箍之後, D牙仲係有D酸軟...

唉...呢D咪叫,自己種下的因,換來今日的果囉....

好啦~當順便減肥, 食少D!

Day 178

今日終於好好多....D牙帶箍除箍都無痛....食野都回復正常~

好多朋友都話我瘦左...又真係既...我輕左成10磅....

佢地個個都話要去箍牙....不過我就話, 首先要好似我咁懶先得~哈哈

因為帶牙箍之後, 我基本上一天只吃2餐, 午餐同晚餐

中途肚餓都唔會食其他野, 包括零食....因為我懶得食完再刷牙再帶牙箍...

當然, 我身邊有d朋友箍牙無瘦到...因為佢地食完野之後好多時都唔刷牙...

又或者直接帶住牙箍食野....

有睇開我個blog既朋友, 應該記得我係好開頭既時候有試過去飲宴食飯唔除牙箍...

個次之後,我都無試過帶住牙箍食野啦~

所以, 唔一定箍牙會瘦架!!

Day 184

聽日就換新牙箍...今次進度幾好(個人認為)....聽日換箍應該唔痛啦掛...哈哈

隱適美箍牙過程全紀錄 #康齒堂 #游舜華牙醫 #透明牙箍 (第 12 副牙箍)

Day 157

今日換新箍, 牙醫話我下排牙齒仲有幾副就箍完....好期待

不過都要繼續帶住...要等埋上排牙先得

Day 159

今日去旅行呀....會去台灣....

琴晚全個台灣地震, 有少少擔心....希望琴晚震哂, 唔好再震啦!

Day 165

返黎啦~ 無經歷到地震, 多謝上天保祐~

今次去左好多地方, 高雄,六龜溫泉,台東,墾丁...好開心

去到台灣咁多野食既地方, 我帶牙箍既時間得返好少....

睇黎進度又要推遲啦!

Day 170

去完台灣返黎已經儘量帶多D時間, 但係好似仲係差少少咁...

無錯, 當你帶到咁上下多既牙箍時, 你已經開始自己feel到D牙郁得夠唔夠...

所以本來我是明天要換牙箍的, 但打算帶多一日~

隱適美箍牙過程全紀錄 #康齒堂 #游舜華牙醫 #透明牙箍 (第 11 副牙箍)

Day 140

不好意思, 最近實在太太太忙了....

所以都沒有好好上來紀錄....今晚換牙箍了

今早還將第10副牙箍遺留左在洗手間....

好彩今晚剛好要換新牙箍...否則我D牙又要受罪啦!

Day 144

為了報答大家, 我再度放相...

這是我的第1至10副牙箍....

第2及第5副無左牙箍...就是因為香口膠和酒樓遺留所至囉.....

影相的時候還未帶第10副, 所以牙箍比其他明顯較白...哈哈

Day 147

今日係我剛剛好箍了一半療程既日子....係咪好無聊呢...咁都記住~

雖然我箍牙既時間相比好多人黎講已經算好短...

但我仍然希望快D箍完~~

Day 150

我又回來了....今日上一上磅, 發現又輕了....

由上年11月到現在, 已經輕左差不多8磅...真係令人興奮~

見親朋友都話我瘦左...個個都爭住話要箍牙~哈哈

不過主要原因都係因為一個字...."懶"

我實在唔會為左食零食而除牙箍....因為又要刷牙再帶返...

另外, 我發覺食野既速度真係減慢左好多....要好好地咀嚼嘛~

所以正餐都比平時食少左野...

如果你帶牙箍都不停咁食食食....係唔會瘦架!! 哈

Day 156

今日去了覆診, 順便預約了下次洗牙....

牙醫話我既進度良好~ 無咩問題....

今日見到黎緊康齒堂會有open day...

影低左張相俾大家, 個日好似會有優惠...

其他康齒堂都好似有...你地可以打去問下...

隱適美箍牙過程全紀錄 #康齒堂 #游舜華牙醫 #透明牙箍 (第 10 副牙箍)

Day 126

今晚帶第10副牙箍啦~ 帶上去都有少少緊...不過唔痛....OK

今晚燙親隻手....牙又緊...手又痛....睇黎今晚無教好訓啦 > <

Day 129

愚人節快樂~ 不過我唔會整蠱大家既....

放相俾大家睇啦~

呢個就係每一副牙套個袋....第一次拎牙箍時, 已配備左2粒牙膠, 第2粒係備用既

每次帶完牙箍之後, 就用牙膠係咁咬咬咬...令到D個牙箍更貼D牙...

至於詳細點用...當你真係去箍牙時, 牙醫會教你架啦~ 哈哈

隱適美箍牙過程全紀錄 #康齒堂 #游舜華牙醫 #透明牙箍 (第 9 副牙箍)

Day 112

今晚換新牙箍....上排牙好似有少少緊

Day 114

唔知點解今次個牙箍好有感覺....上排牙帶上去每次都有D痛....今次無偷懶...帶足22個鐘...

Day 119

今日已經帶左第7日....但係上排牙個牙箍帶返上去都仲係有D痛....

睇黎今副牙箍真係郁好多牙....

Day 122

之前應承左大家影相....今日終於有時間....復活節快樂呀!!


呢個就係隱適美個盒....

打開入面有2個盒, 係用黎裝牙箍的....一個係放現時箍緊的牙箍, 另一個係放上一副的,
因為萬一唔見左現時箍緊的牙箍, 就要帶住上一副牙箍用住先....


哈哈....今日吊下你地胃口先....之後我會再放多D相....

Day 125

過完開心既復活節....聽日要換新牙箍啦....今日終於帶上下牙箍都唔痛啦...

睇黎終於帶夠時間...

隱適美箍牙過程全紀錄 #康齒堂 #游舜華牙醫 #透明牙箍 (第 8 副牙箍)

Day 99

今日帶新牙箍，有少少緊

Day 101

我發覺每次換左新牙箍，夜晚都會發好多夢， 唔知係咪新牙箍有D力度，所以唔太熟睡呢??

Day 105

今日去覆診，話我進度良好

牙醫同我一齊睇我個電腦模擬圖，由第1副逐副睇....

睇到今日第8副，D牙齊左好多，原來我下面D牙係唔齊過上面，

牙醫話我未箍之前咬合位唔太好，其實應該咬野比較差，不過我又唔覺喎....完全無留意過~

睇返依家第8副箍完既模擬圖，牙醫話我入面D牙係齊左好多，咬野食應該好左...

而我亦都係唔覺既....哈哈哈....只因我太鐘意食

Day 109

其實寫寫下, 開始發現無咩野寫....因為箍牙已成生活一部分...

又無再驚, 又無再痛, 只係每日都除除帶帶咁...哈哈

唔知各位係咪都係睇到悶呢??

好似箍左咁耐, 都未放過D牙箍既真身...

好....大家等下我....搵日影比大家睇~

隱適美箍牙過程全紀錄 #康齒堂 #游舜華牙醫 #透明牙箍 (第 7 副牙箍)

Day 82

今日帶第7副牙箍, 話咁快就已經第7副, 即係仲有14副就箍完啦~

假期就黎完, 又要開始工作, 不過復活節好快到, 又有得放假lu....

每年年尾至年頭都特別多假期, 正呀!

祝情人節快樂~

Day 86

今日我又無聊, 係度計下自己到底要箍到幾時....

結果係 9 月頭我就可以完成哂成個療程 (如果乖乖地帶,無delay的話,哈哈)

其實箍完之後仲有一次refinement (免費包一次的)

所以有機會係要再帶一段時間....不過點都好, 依家已經係2月

9 月就箍完呢個感覺唔錯....

Day 91

今日同朋友食飯 (除左牙箍)...

之後影相, 由於影左好多張.....返到屋企我就逐張逐張睇下...

真係好左好多啦....正面影既話真係唔多覺有哨牙

以前會見到2隻門牙突出黎架...

側面既話就仲係有啲見到...不過某啲相就見唔到啦~

牙齒真係好影響架....雖然以前影相都會露啲牙咁笑...但係成日影完都覺得唔靚

而且有時同啲朋友一齊, 都會笑得無咁放肆....

箍完牙之後, 我一定會儘情咁笑!!

Day 98

聽日換新牙箍, 近呢幾個牙箍, 我都按自己帶既時間長短, 而決定帶多一日或2日

因為帶唔夠時間就換新牙箍....會比較有感覺

哈哈...各位唔好學我, 最好都係日日帶足22個鐘~

隱適美箍牙過程全紀錄 #康齒堂 #游舜華牙醫 #透明牙箍 (第 6 副牙箍)

Day 68

今朝起身......好...好....好.....痛呀!!!!

好似去返第一副牙箍咁樣樣樣樣.....

我以後除左牙箍都一定會第一時間放返入手袋....絕對唔會再有下次!!


Day 69

今日又好返D...唔痛啦....只係下排牙有D酸酸既感覺....

又照下鏡....原來上面兩隻門牙真係直返好多, 同旁邊個2隻牙得返小小距離渣~

好開心呀~~~

今日諗諗下, 原本上一副牙箍遲左2日先帶,要押後我既完成日子

點知今次唔見左牙箍, 又推早左, 依家變左早3日完成....

哈哈, 又要改個schedule....希望唔好再有事發生, 好好咁箍埋佢~

Day 71

wakakaka.....今日有好消息~ 磅一磅, 輕左5磅~

心諗係咪個磅壞左? 叫家人試一試.....無壞~ 即時笑出黎

5磅....5磅....係5磅呀~

之前點減都輕唔到5磅....

估唔到箍牙真係有D幫助...箍左2個月,輕5磅....箍4個月係咪可以輕10磅呢?? (妄想中.....)

我諗輕左最大原因係少左食零食....因為每次食野都要除牙箍....

因為我好懶....索性唔食, 變左淨係食正餐....正餐係食好多架!

所以話....零食真係致肥元兇!!

Day 75

聽日就係新年啦~ 同大家拜個早年先~

恭喜發財! 身體健康! 心想事成! 財源廣進! 青春常駐!

初五先再同上黎update.....要去拜年呀~好忙呀~哈哈~

Day 80

再次同大家拜個年先, 猴年進步, 橫財就手, 盤滿缽滿~ 恭喜恭喜

新年又再食食食....真係食到個人好似一舊年糕咁呀!

第6副牙箍帶得唔錯, 今日已經好輕鬆, 睇黎今副帶得夠時間,真係唔同啲....

隱適美箍牙過程全紀錄 #康齒堂 #游舜華牙醫 #透明牙箍 (第 5 副牙箍)

Day 59

唉....今朝起身D牙好痛, 雖然無第一副牙箍咁痛, 但係都唔好受....

只怪自己上一副帶得唔足時間, 令自己咁痛苦, 以後我會乖乖帶返足D時間....."哭"

Day 60

今日上網見到有人話個牙箍會刮邊, 覺得質素唔好....

我又無既情況, 只係第一副牙箍, 個人唔習慣多左野係個口入面, 成日用條脷去整個牙箍D邊位,

就整損左少少條脷....之後都一直無事....

而且個牙箍係有厚度既膠, 根本無可能完全貼伏係D牙邊既.....

所以提醒各位, 唔好成日用條脷去整個牙箍, 就無事啦~

Day 62

琴日大家有無去大帽山睇冰? 我當然無....咁鬼凍...一直都係房唔願離開張被, 哈哈

好彩今日係星期日, 好多人都唔洗返工, 可以係屋企開住暖爐暖笠笠

希望聽日暖返D,唔洗咁凍啦~

Day 67

今日大大大大大件事....

去飲茶, 因為同家人一齊去, 唔怕尷尬, 我除左個牙箍就咁放左係枱面(有用紙巾包住的!!)

點知返到屋企刷完牙, 諗住帶返既時候.....

無既? 無既? 手袋無既? 衫袋都無既?......副牙箍無既?

OMG.....留左係酒樓....

只係帶左8日渣.....仲有6日要帶架....唯有帶副新牙箍.....

帶上去個下...即時覺得......................好痛#x$#%$^%&&^&^*#

而且好明顯地見到唔貼D牙既, 證明上一副真係未帶夠時間呀!!

我琴晚發夢自己唔見左副牙箍, 仲係個夢入面話"呀~我仲有成10日8日未帶架~~~~~"

今日竟然夢境成真........幾時發夢中六合彩呀?!

隱適美箍牙過程全紀錄 #康齒堂 #游舜華牙醫 #透明牙箍 (第 4 副牙箍)

Day 43

今晚終於換第4副牙箍, 睇黎我之前既擔心又係多餘的....

因為又係完全唔痛....可以舒舒服服咁訓教....早抖~

Day 45

Yoho~ 聽日我要去旅行了....期待已久, 亦係我第一次帶住牙箍去旅行.....

返黎再見~ byebye

Day 51

我返黎啦, 仲係10級holiday mood呀!

去旅行帶牙箍係點? 只可以話, 好似阿婆囉....

食親野都除, 轉頭又帶, 當然掃街梗係唔帶, 要好好enjoy嘛,

由於無得成日刷牙, 所以副牙箍都黃左不少....

晚晚帶返副牙箍訓都好似有少少緊既感覺, 但第二朝係唔痛既, 各位可以放心

睇黎我今副牙箍又要帶多一兩日先得啦....

Day 53

話說我旅行時帶牙箍個陣, 隻手指唔小心割損左D牙肉.....最入面隻大牙果位

唔知係咪太接近個牙箍...一直都未好返

琴日起身塊面仲腫左....

所以琴晚連牙箍都無帶住訓....今朝起身真係好返好多...起碼無腫面!!!

唉....呢幾日都帶得咁少時間, 唔知點解, 覺得D牙好似又郁返出左D.....

希望只係心理作用.....嚇我唔到既~~~~~~~~~

Day 55

聽日要去覆診啦~ 今日睇下D牙, 發覺2隻門牙真係開始直返....無咁哨,好開心呀~

見到有效果, 個人特別興奮架!

Day 56

今日去覆診, 我自首話俾個牙醫聽我第4副牙箍帶得唔夠時間...

佢批准左我帶多2日, 即是話我既箍牙日子要延長多2日啦~~~~

隱適美箍牙過程全紀錄 #康齒堂 #游舜華牙醫 #透明牙箍 (第 3 副牙箍)

Day 29

食完冬至飯返到屋企已經成11點幾啦~ 臨訓前就換上新牙箍...

唔難帶喎, 應該係已經適應左有粒粒既牙箍, 只係有點緊...

不過有點緊係正常吧....如果第一次換都唔覺緊, 先應該有問題....哈哈

分享一下, 今日做左件蠢事....

話說我成日都話無感覺到好似無帶個牙箍咁....

結果, 今日我朋友問我食唔食香口膠, 我二話不說咁就放左入口...

咬左第一下....就知癩左野啦~ 完全唔記得自己帶緊牙箍...

諗住唔咬, 淨係食下D味啦....點知舊香口膠開始癡住我個牙箍....

返到屋企, 好耐都洗唔甩, 好彩呢副牙箍已經係最後一日, 所以索性由得佢....

所以............................大家................千萬.........................唔好食香口膠呀!!

Day 31

平安夜快樂....

今晚出街食飯, 食完無節目就返家了....

所以返到屋企先帶返牙箍~

因為我平時中午係街食, 食完勁漱口, 之後帶返個箍...

夜晚返到家個牙箍會有好多漬....

又加上個牙箍有D粒粒既位, 所以更明顯...

因為咁....我通常係街食完飯, 好快就返家既話, 我都會選擇返到家先帶....

寧願帶少陣~

Day 33

Happy Boxing Day~

開始習慣既我, 有時出街食飯, 懶得去廁所, 都已經可以唔照鏡就咁剝牙箍啦

當然, 最好都係去廁所啦, 用水沖一沖先收起, 點都乾淨D嘛....

呢幾日都出街食飯....真係帶少左好多時間, 希望D牙聽聽話話, 郁多D...

如果唔係下次換箍可能....會好痛!

Day 36

今日去左海洋公園, 我又無帶牙箍好多個鐘....

因為我發覺原來帶住牙箍玩機動遊戲.......係無咁爽架!!!

好緊張既時候, 咬緊牙關, 但帶住牙箍只會""咬緊牙膠""....

我為左盡興D, 就除左牙箍囉~

Day 39

2016
Happy New Year!!

琴日大家有無去睇煙花? 都幾好睇呀~ 睇到好多哈哈笑樣....

新一年祝大家身體健康, 事事順利~


Day 42

因為聽日係特別日子, 好怕第4副牙箍會緊到痛, 所以延長一日先換新箍....

反正第3副箍都好多日子帶唔足時間, 帶多一日都好呀....哈哈